Продолжуваат сојузничките напади врз Либија
26 март 2011
Коалицијата синоќа го нападна градот Злитен, оддалечен 160 километри источно од главниот град над подрачјето Ал Ватија и ја бомбардира воената база во Таџир, предградието на Триполи. Неколку воени бази се сместени во ова источно предградие на главниот град кое е секојдневно мета на напади на коалицијата од почетокот на операцијата во Либија од 19 март. Националната телевизија објави претходно дека цивилни и воени цели во Злитен се мета на бомбардирање на „колонијалистичкиот агресор“.
Подрачјето кај Ал Ватија во кое се наоѓа воената база исто така е мета на ракети со долг домет, додава телевизијата. Вчера либискиот режим изрази подготвеност да го прифати планот на Африканската унија кој нуди прекин на судирите и отворање на дијалог меѓу Либијците како претходници на демократската транзиција. Како што се ближи самитот предвиден за во вторник во Лондон, францускиот претседател, Никола Саркози, најави француско-британска иницијатива за политичко решавање на судирот.
Во текот на последните часови, ловците-бомбардери на коалицијата извеле серија напади врз позициите на силите на Гадафи во градот Аџдабија. Искористувајќи ја поддршката, бунтовниците презедоа офанзива и повторно продреа во тоа стратешко место, 160 километри јужно од Бенгази.
Приврзаниците на Гадафи во петокот продолжија да го бомбардираат Мисрата, 200 километри источно од Триполи, рече сведок и истакна дека се убиени една мајка и нејзините четири деца. Во четвртокот лекар од болницата во Мисрата утврди дека има 109 мртви и 1.300 ранети за една недела.
САД соопштија дека испалиле 16 Томахавк ракети врз либиски цели во текот на последните 24 часа. Коалициските авиони извеле 153 полетувања, од кои 67 американски и 86 на земјите членки на коалицијата. Полковникот Гадафи, кој e на власт е речиси 42 години, од 15 февруари се соочува со бунт во кој загинаа повеќе стотици лица, а 300.000 беа приморани да избегаат. Вчера Гадафи соопшти дека ги унапредува сите припадници на своите вооружени сили, поради нивните херојски борби.
Автор: ЖА/макфакс
Редактор: Борис Георгиевски