Премиерката го распушти парламентот во Тајланд
9 декември 2013Ненадејната изјава на Јинглак Шинаватра се случи додека околу 100 илјади демонстранти излегоа на улиците на Бангкок да бараат смена на владата и заминување на влијателното семејство Шинаватра од земјата.
Вчера, сите опозициски пратеници го напуштија парламентот, а за денес е најавен марш кон зградата на владата.
Јинглак победи на изборите во 2011., но вчера најави дека планира да го распушти парламентот и да свика избори „во најкус рок“.
„Владата не сака да се губат животи. Во оваа фаза, кога многу луѓе се противат на мојата влада, најдобар начин да му се врати власта на тајландскиот народ е да се одржат избори“, изјави таа.
Кралот на Тајланд ќе мора да го одобри распуштањето на парламентот, по што изборите треба да бидат закажани во рок од 60 дена.
Тајланд е во перманентна криза од 2006. година кога војската го смени од власт Таксин Шинаватра, братот на Јинглак, кој потоа побегна од земјата за да избегне затворска казна за корупција.
Опозициските лидери велат дека нема да бидат задоволни само со смена на премиерката, туку сакаат да го ослободат Тајланд од нејзиното моќно семејство.
Практично, во судир се елитата и образованата средна класа на Тајланд со сиромашната селска гласачка база на кланот Шинаватра, придобиени со популистичка политика.