Помошта за азилантите во Германија не е доволна за достоинствен живот
18 јули 2012Германската марка веќе одамна е историја и повеќе од десет години се плаќа во евра. Во законот за помош на барателите на азил сепак и натаму се зборува за старата валута. И висината на износите кои барателите на азил ги добиваат од државата се немаат променето од стапувањето на законот во сила пред 19 години: 360 германски марки или 184 евра. Законодавачот досега нема земено предвид дека се’ е поскапено. Експертите сметаат дека само прехранбените производи поскапеле за 25 насто.
Не е гарантиран достоинствен живот
Колку средства му се потребни на барателот на азил месечно се проценува „од рака“ , гласи острата пресуда на Покраинскиот социјален суд на Северна Рајна Вествалија во февруари 2010-та година. Социјалната помош „очигледно не е доволна за да обезбеди достоинствена егзистенција“, реагираа судиите во Есен на тужбата на еден брател на азил. Помошта за азилантите не е во согласност со уставот, порачаа покраинските судии и затоа со овој проблем се позанимава и Сојузниот уставен суд. Судиите во Карлсруе денеска одлучија дека законски предвидената социјална помош за азилантите го прекршува основното уставно загарантирано право на достоинствен егзистенцијален минимум.
Државната помош за азилантите и бегалците мора да се зголеми барем на нивото на социјалната помош за невработените германски граѓани - наречена Харц 4.
Државата мора повеќе да плаќа
„Од 1993 година наваму социјалната помош за азилантите не е зголемена. Додека примателите на Харц 4 добиваат по најмалку 364 евра месечно, за бегалците државната помош изнесува најмногу 220 евра. Со тоа евидентно не се обезбедува неопходниот егзистенцијален минимум за овие лица“, изјави потпретседателот на судот во Карлсруе Фердинанд Крихоф, при соопштувањето на пресудата. Износите кои ги добиваат примателите на социјалната помош Харц 4 веќе важат како егзистенцијален минимум.
Судот го обврза законодавецот, односно државата, да донесе нов закон во кој ќе утврди нови правила за давање социјална помош на барателите на азил.
Првобитно законот за социјална помош за барателите на азил важеше само за бегалците за време на процесот на добивање азил. Законот, меѓутоа, беше проширен и на други луѓе без дозвола за подолготраен престој во Германија - според податоците на Сојузниот завод за статистика на крајот од 2010-та година во Германија имало вкупно 130.300 лица со таков статус.
.