Плаќање со мобилен телефон

Вакви промени се предвидени во измените на Законот за платен промет што денеска (02.11) ги објави македонскиот вицепремиер и министер за финансии Зоран Ставрески

„Со измените на Законот за платен промет се воведува една современа можност за дополнителен метод и начин за плаќање на услугите преку користење на мобилните телефони или преку користење на интеренет и кабелските провајдери. Имено, со измените на законот, се овозможува мобилните оператори во договор со субјектите кадешто ќе се вршат услугите да постават терминали и со приложување на мобилниот телефон на тие терминали, исто како што со кредитна картичка се врши плаќањето, да се активира вашата сметка на мобилниот телефон со внесување пин и да се плати сметката. Потоа, на крајот на месецот, трошокот ќе биде вклучен во фактурата која ќе ви ја достави мобилниот оператор. Истото ќе може да се направи преку сметките за кабелските и интернет провајдерите“, појасни на денешната прес-конференција министерот Ставрески.

Тој додаде дека така ќе може да се плаќа и за артикл или некоја услуга која е порачана од дома и испорачана во домот.

Според министерот ова ќе придонесе за зголемена конкуренција во платниот промет, намалување на провизиите и олеснување на граѓаните од аспект на тоа - кога треба да платат некоја услуга да имаат повеќе опции на располагање.

Според измените во законот, плаќањата кои ќе можат да се вршат преку мобилните оператори и преку кабелските и интернет провајдери, ќе бидат ограничени за поединечен износ до 1.000 денари, а вкупно во текот на месецот 6.000 денари. Кај поединечните оператори ограничувањето на вкупните трансакции што може да се платат на ваков начин е 100 милиони денари месечно за сите корисници на услуги.

За да може да се користи оваа можност ќе треба да се склучат договори меѓу операторот, односно посредникот, и оној којшто ја дава услугата, а исто така ќе треба да бидат и исполнети критериумите за вршење на платниот промет на Народната банка, што значи дека секој од овие мобилни оператори, кабелски и интернет провајдери, ќе треба да добие одобрение од Народна банка преку исполнување одредени капитални и технички услови. Ставрески истакна дека претходно е разговарано со мобилните оператори, на чие барање е и направена измената и оти од нивните информации веќе некои мобилни оператори прават технички подготовки за воведување на вакви услуги.