Отрезнувачко признание

Вниманието на Американците повторно е насочено на 1.500 метри морска длабочина, каде роботи, клешти и пили се обидуваат да ја отстранат хаварисаната цевка и дури потоа да спуштат капак над изворот. На капакот се наоѓа отвор, преку кој со помош на долга цека нафтата која истекува би се слевала во танкери. Ова теоретски е можно, но „БП“, во првиот обид да спушти капак не успеа. Поради ниските температури на дното на морето, на капакот се формираа ледени кристали. Сепак, менаџерот на „БП“, Боб Дадли е оптимист: „При првиот обид научивме многу. Сега со помош на врела вода и антифриз ќе се обидеме да го намалиме ризикот да се формираат ледени кристали.“

„БП“ на морското дно има поставено различни капаци. Во случајот со едниот да не успее, концернот може веднаш да изврши проба со друг. Но, и овој обид со помош на капак да се сопре истекувањето на нафта во Мексиканскиот залив е опасен. Имено, кога ќе се пресече оштетената цевка, во првиот момент ќе почне да истекува уште поголемо количество нафта, вели адмиралот Тед Ален, од крајбрежната служба. „Пред да биде спуштен капакот, може да истечат 20 проценти повеќе нафта.“

Опасноста и натаму постои

Од вчера (01.06.2010), Тед Ален самиот излегува пред новинарите, а не како досега со претстваник на „БП“. Со ова владата на Обама, уште појасно отколку досега, сака да се дистанцира од „БП“. Белата куќа сега ја застапува тезата, да не се будат веќе лажни надежи. Министерката за животна средина во администрацијата на Обама, Керол Броунер истакнува: „Се надеваме на најдоброто, но се подготвуваме на најлошото.“

Најлошото би било да пропадне и овој обид. „Да бидеме искрени: во тој случај би можело да се замисли дека ќе истекуваат дневно меѓу 1,9 и 3,6 милиони литри нафта и тоа се’ додека не завршат дупчењата со кои ќе се растовари изворот. Ситуација, која многу загрижува.“

Имено, ваквите дупчења би траеле до август, по што најверојатно би се запрел изворот. Тоа би значело најмалку уште 60 денови во кои милиони литри нафта би се излеале во Мексиканскиот залив.

Вакватата ситуација го става под притисток и претседателот Обама, кој вчера се закани дека одговорните ќе бидат изведени пред суд. Министерот за правда потоа најави дека започнал истрага за случајот, а „Бритиш петролеум“ одговори дека целосно ќе кооперира.

Автор: Ана Енгелке/ Александра Трајковска

Редактор: Елизабета Милошевска Фиданоска