Откриени 13 напаѓачи во инцидентите во скопските автобуси
19 ноември 2013Македонската полицијата уапсила 13 малолетници осомничени дека учествувале во два напади во автобуси на ЈСП Скопје. Инцидентот што се случи во четвртокот минатата недела (14.11) во Стајковци сѐ уште не е расветлен. „По преземените мерки и дејства за откривање на сторителите, извршените разговори и препознавање на лица, осомничени се вкупно 13 малолетници, со што бројот на малолетници кои годинава се откриени и санкционирани заради учества во инциденти се искачи на 150 лица“, соопшти денеска МВР.
Осум малолетници од Скопје, селото Батинци, Грчец и Студеничани го нападнале 17-годишниот ученик на улицата „Трета македонска бригада“ во автобус на ЈСП број 33. Без повод и причина го нападнале со тупаници по телото, по што малолетникот завршил во болница.
Другиот инцидент се случил во петокот во автобус на ЈСП број 7, кога поголема група нападнала 15-годишен ученик, повторно без повод и причина. Го удирале со боксови во пределот на главата и рацете, а за овој напад осомничени се петмина малолетници од Скопје, Арачиново, Студеничани и од Рашче.
Двајца од напаѓачите учествувале во двата инцидента, а повеќето од нив ѝ се познати на полицијата и против нив досега се поднесени пријави за кривични дела поврзани со насилство.
Од министерството соопштуваат дека интензивно работат на расветлување на инцидентот што се случи во автобусот на ЈСП број 65 во село Стајковци. Во четвртокот вечерта 10-15 лица маскирани со шалови и со метални шипки нападнаа повеќе патници, а неколкумина малолетници завршија во болница.