Отворен 65-от Кански филмски фестивал

На Канскиот фестивал има 91 филмско претставување од 30 земји. Саша Барон Коен предизвика внимание меѓу бројните филмски ѕвезди, кои прошетаа на црвениот тепих и се искачија по скалила над кои е портретот на најпознатата блондинка на светот – Мерилин Монро, чија фотографија е избрана за официјален плакат на фестивалот. Коен, или генерал адмиралот Аладин, и во Кан ја промовира својата најнова комедија, во која глуми лик на диктатор. Во текот на денот тој одржа прес-конференција пред хотелот, каде беше донесена камила, а потоа за да привлече внимание генерал адмиралот Аладин се прошета по локалните продавници, следен од бројни фотографи, предизвикувајќи застој во сообраќајот и дополнителни грижи за полицијата. Но, медиумите оценуваат дека тоа е добар начин за промоција на неговиот филм.

Жирито од деветмина ќе треба да донесе одлука за победникот на 65-тото издание на фестивалот, а за таа награда има 22 филма – кандидати. Претседател на жирито е Нани Морети, кој ја ја освои врвната фестивалска награда во 2006-та година.

Предвидениот буџет за годинешниот филмски фестивал во Кан, што трае од 16. до 27. мај, ќе изнесува 20 милиони евра, а заработката од него ќе надмине 130 милиони евра. Половина од буџетот е обезбеден од јавни фондови, преку француското министерство за култура, градот Кан и останатите општински институции. Останатиот износ го финансираат приватни компании, професионални здруженија, како и официјалните партнери на Фестивалот.

На Фестивалот се отворени 3.000 нови работни места. Инаку, бројот на жителите на Кан станува тројно поголемво време на одржување на манифестацијата и надминува 200.000, а хотелиерите во ова гратче на југот на Франција за овие 10-12 дена остваруваат 15 отсто од својот годишен приход.