"Нарцисус" на Богоја Ангелоски изложена пред берлинската публика

Нарцисус во митологијата е познат како еден од најубавите мажи, кој ја имал таа несреќа да се вљуби во самиот себе. Преданието вели дека во него се вљубила нимфата Ехо. Кога љубовта не и била возвратена,таа исчезнала од шумите и планините. Не и остнатле ниту коските кои се претвориле во камења. Поради тоа другите нимфи го проколнале Нарцисус да страда и да се вљуби во самиот себеси. Така и се случило. Еден ден додека седел крај рибникот Нарцисус го здогледал сопствениот лик во водата и се вљубил.

Бидејќи љубовта не му била возвратена, умрел од тага токму крај истиот тој рибник. Нимфите и покрај се тагувале. Кога сакале да го погребаат, не го нашле неговото тело, туку нашле цвет кој и до денес го носи името Нарцис.

Цвекиња во галеријата на Прима центар во Берлин деновите нема. Но, петте дрвени скулптури , со позамашни димензии, со едноставни мазни површини, со еротични свиоци и тоа како ја илустрираат митолошката приказна која пред берлинската публика овој септември ја раскажува скулптпрот од Гостивар Богоја Ангелоски. Го запрашавме како и кога ги создал Нарцисус, вилата Ехо, машкото и женското Его...

"Скулптурите ги создадов последниве два месеци, овде, во Берлин.Работев во една работилница, една мала фабрика на еден мој драг пријател. Делата се работени во дрво и темата е митиолошка, приказната за Нарцисус. Тоа ми беше појдовна инспирација, преку овие скулптури да изразам една блага иронија и да се префрлам во современото живеење"- вели Ангелоски.

Тој кажува дека го интересира решението на естетскиот момент. Дрвото како материјал за скулптура го користи подолго време, зашто како вели е податно, иако работи и со метал, камен... Доста го негува и цртежот, кој впрочем може да се каже е една од фазите до вајањето на делото и токму со него последниве години самостојно се претстави и пред македонската публика.Признава дека од уметност денес тешко може да се живее , особено во помалите места и во сиромашните држави, но вели дека и уметниците имаат право да бидат она што се - творци... И да живеат од својот труд иако е многу, многу тешко зашто творештвото е всушност скапа работа. Особено ако не е чисто комерцијално. А, неговото очигледно не е!Зошто во Берлин Богоја Ангелоски се зафати токму со митологијата и митот за Нарцисус?

"И во претходното мое творештво ги третирам темите сон, приказна..Митовите се преувеличани приказни и секој си има и своја вистина. Митови се прават и денес.. Тука сакам да потсетам на нешто. Ние сите на некој начин сме Нарциси,. Сите се гледаме во огледала, во излози, по малку сме суетни и сите ние тонеме во нашите сопствени езера"