Напад врз Министерството за одбрана во Јемен

Група вооружени напаѓачи денеска изврши напад врз Министерството за одбрана во Сана, главниот град на Јемен. Атентатор-самоубиец прво се разнесе со автомобил бомба на вратата на институцијата, а потоа вооружени лица упаднале во комплексот и влегле во судир со силите на безбедноста. Во меѓувреме, ситуацијата е под контрола. Бројот на загинатите, според информации од Министерството за одбрана, изнесува 25 лица, иако лекарите споменуваат за 50 загинати и над 100 ранети. Јеменското министерство за здравство упати повик до граѓаните за дарување крв.

Цел на нападот била воената болница во рамките на комплексот во Министерството за одбрана, поради тоа меѓу загинатите има бројни здравствени работници. Според првите извештаи, загинале шест лекари, како и петмина пациенти.

Во времето на нападот во посета на комплексот била странска делегација. Министертството за одбрана се наоѓа во стариот дел од Сана, каде е лоцирана и Централната банка. Засега никој не ја презеде одговорноста за нападот. Јеменската полиција во послендо време зачестено се бори против бунтовници и исламистички групи. Нивна цел најчесто се воени бази, нафтоводи и гасоводи. Според власта, овие групи имаат тесни врски со терористичката организација Ал Каеда.