МПЦ ги збива редовите

Во МПЦ се надеваат дека по божикните празници ќе го чујат ставот на Српската православна црква во однос на иницијативата за продолжување на дијалогот. Во меѓувреме, МПЦ се обидува да ги збие своите редови. Ќе ги прими назад монасите кои пред неколку години се приклучија на братството на Вранишковски, а сега во очи на Божик решија да ја напуштат нерегистрираната Православна Охридска Архиепископија. Поглаварот, г.г. Стефан вели дека очекувал ваков развој на настаните:

“Лично бев изненаден во моментот кога отидоа таму каде што отидоа,а нивното напуштање на местото каде што отидоа и веројатно нивното враќање во МПЦ не ме изненадува. МПЦ изрече мерки кон нив, канонски мерки и тоа треба да се почитува и од едната и од другата страна и треба да се постапи онака како што треба да се постапи. Доколку постои желба за враќање, црквата ќе најде решение.“

МПЦ ги расчини монасите Максим, Дионисиј и Порфириј, но сега им ги отвора вратите ако сакаат да се вратат. Познавачите на црковните случувања велат дека за дел од одметнатите монаси било неприфатливо приклонувањето на Вранишковски кон српската црква, а разочарувањето е уште поголемо оти тие останале без повисоките црковни чинови кои им биле ветени. Сега решиле да ги симнат мантиите оти сфатиле дека на времето биле изманипулирани.