Мобилноста на студентите во Германија
1 ноември 2011„Стекнување искуства, запознавање нови луѓе и култури“, објаснува студентката Елена.
„Тоа што сме постојано подвижни и не студираме на едно место. Да разменуваш искуства со други студенти“, вели Никлас.
„Да се биде флексибилен, мобилен, да се стигне од А до Б што е можно побрзо и поедноставно“, додава Јулија.
Токму овие работи се особено важни за студентите во Германија. Голем број високо-школски институции, универзитети немаат свои централни кампуси, туку многубројни згради што се распространети насекаде низ градот. Затоа мора брзо да се стигне од едно до друго место. Поради тоа поголемиот број од студентите користат велосипед. Тоа е поефтино, а и патеките за велосипедисти се добро направени и организирани. Ова меѓутоа не е за сите студенти најдобриот начин на мобилност, бидејќи многу странски студенти во нивните татковини одат со воз или пак, автомобил до универзитет. Еден од нив е Петер од Сиднеј, Австралија: „Едноставно, не е практично да имаш велосипед, бидејќи градот е многу голем. Сиднеј е многу голем град и нема обележани патеки за велосипедисти. Премногу е небезбедно. Она што веднаш го забележав кога дојдов во Германија беше неверојано големиот број велосипеди“, вели Петер.
Добра инфраструктура за велосипедисти и јавна сообраќајна мрежа нема во секоја држава
Миренда од САД на пример, не би можела да тргне никаде без автомобил. „Во Мисури имаме навистина само автомобили. Овде во Германија има повеќе различни можности, а и многу работи и места не се одалечени едни од други.“ За разлика од САД во густо населената Европа се чини дека се’ се наоѓа едно покрај друго. Поради тоа голем број странски студенти од прекуокеанските земји ја користат можноста што е можно подолго да останат во Германија за да можат да посетат и видат повеќе работи во Европа. Миренда до сега посетила 16 земји – патувала како сопатничка со автомобил со некој друг, со паушанла карта за меѓународни возови и со авион. Имено, луѓето во Германија кои патуваат со сопствен автомобил до некое поодалечено место или град во интернет нудат можност да патува и некој друг со нив за мали пари. Патниците ја делат сметката за бензин. Тоа се најчесто луѓе или студентите што работат на едно место, а живеат на друго и преку викенд си одат дома. И Петер од Сиднеј сака да патува како сопатник со некого во автомобил. „Оваа можност во Германија е одлична, освен тоа многу е поефтина за разлика од патувањето со воз. Сме изнајмиле и автомобил за да ја прошетаме Германија, а сум се возела и со ’интерреил’-паушална карта за користење на меѓународни возови. Освен тоа сум летал и со ’блајд букинг’,тоа е можност ефтино да се лета со авион со непозната цел. Сум ги користел речиси сите превозни средства за да видам какава е разликата“, раскажува Петер.
Плати, купи авионска карта и летај
Т.н. „Блајд букинг“ е наменет пред се’ за спонтани студенти. Прво се купува ефтина паушална авионска карта и дури потоа, по избор на случајност, дознаваш во кој град, од понудените десет, ќе леташ во Европа. „Интерреил“ значи да се патува со воз низ повеќе европски земји за ефтини пари. Студентката Ана од Украина лета со авион само доколку нема друга можност. За неа мобилноста е пред се’ прашање на свест за заштита на околината. „Мене ми е чест да се возам со воз. Познато е дека постојаното патување со авион е штетно за животната средина. Но, летам и на подолги релации.“
Не само љубопитноста за откривање на странски култури го буди поривот за патување, туку и фактот што искуствата од странски универзитети се многу важни за биографијата на секој студент кој си посакува успешна кариера. Во ерата на интернетот и глобализацијата студентите се чувствуваат дома во целиот свет. Благодарение на добрата мрежна поврзаност меѓу универзитетите и големиот број стипендии на студентите им стана многу полесно да отидат и да посетат некоја странска земја. Особено германските студенти сакаат да отпатуваат во некоја странска земја. Во 2010 година преку 31.000 стиденти добиле стипендија за студирање во странство. Нивниот број постојано расте, бидејќи познавањето на странски јазик и искуството во странство стануваат се’ поважни. Престојот во странство носи социјални компетенции што работодавачите во Германија многу ги ценат. Студентите кои стекнале искуство во некоја друга земја се посамостојни, пофлексибилни и поотворени.
Размена на искуства и запознавање странски култури
Студентот Никлас смета дека студирањето еден семестар во странство мора да биде важен и основен дел од студиите. „Генерацијата на млади студенти се повеќе го посетуваат азискиот простор. Можам да разберам доколку младите не се задоволат само со посетата на Европа, туку сакаат да одат во Азија, Америка и на многу поодалечени точки на светската карта.“
Болоњската реформа исто така треба да им отвори нови патишта на студентите во светот. Меѓутоа, со целосно пополнетите студентски планови тоа не е лесно. Многумина немаат време покрај студирањето да работат и да заштедат пари за патување. Освен тоа не секој студент добива стипендија со целосно покриени трошоци за престојот во странство. Па сепак, студентите се одлучуваат да одат во странство, бидејќи не сакаат да го пропуштат искуството кое може да го стекнат таму: „Човек само еднаш е студент во животот и само еднаш ја има можноста да живее како студент во странство. Сите овие студенти се многу отворени. Според мене, таквата можност нема да се повтори во животот“, вели студентката Миренда.
Автор: Нина Тројде / Бисера Огњановска Митров
Редактор: Симе Недевски