Медведев денеска ќе биде избран за руски премиер

Владимир Путин уште есента 2011-та година најави дека по претседателските избори ќе го предложи Медведев за премиер. Руската либерална опозиција ја критикува таканаречената „рокада на Црвениот плоштад“ како недемократска. Десетици илјади луѓе во текот на изминатите два дена излегоа на демонстрации против Путин. Имаше и судири со полицијата и апсење на стотици луѓе. Противниците го обвинуваат Путин дека ја води авторитарно земјата и за фалсификат на претседателските избори во март и на парламентарните избори во декември минатата година.

Путин, пак, вчера (05.05) во својот инаугуративен говор, се заложи за единство и решителност на Русите. „Нашите цели ќе ги исполниме само ако сме обединети, ако ја сакаме нашата татковина, руската демократија и нејзините уставни права и слободи“, рече тој во парламентот во Москва. Путин беше претседател на Русија во периодот од 2000-та до 2008-ма година, по што на претседателската функција дојде Медведев, а тој ја презеде премиерската должност.