Македонската опозиција ги продолжува протестите
27 декември 2012Повеќе стотини приврзеници на опозицијата и вчера вечер одржаа протести во центарот на Скопје. На чело на протестите беше најтесното раководство на СДСМ, предводено од лидерот на партијата Бранко Црвенковски и лидерите на другите партии од опозициската коалиција. Како што претходно најави Црвенковски, протестите продолжуваат до петок и тоа секогаш во периодот од 18:00 до 18:30 часот, а за во сабота е закажан протест пред седиштето на ВМРО-ДПМНЕ во Скопје.
Битолската телевизија Тера и охридскиот портал Охрид њуз јавија дека протести се одржале и во Битола и Охрид.
По инцидентите во и пред македонскиот парламент во понеделникот, опозицискиот СДСМ најави дека се повлекува од парламентарната работа и оддржување на протести во цела Македонија.
Собранието на Република Македонија денеска треба да ја одржи 50. седница. На седницата пратениците треба да поставуваат прашања до членовите на Владата. Се очекува пратениците од повеќе опозициски партии да не учествуваат во работата на законодавниот дом.