Македонија ја победи Швајцарија

До значајната победа на натпреварот, кој се одигра во Цирих, Македонија ја предводеа Наумче Мојсовски и Кире Лазаров, кои постигнаа девет односно шест голови. Голем придонес во победата даде и голманот Борко Ристовски кој имаше 10 успешни интервенции.

Важноста на мечот влијаеше врз играта на македонската репрезентација во првото полувреме, кога одбраната беше подобриот дел од тимот. Во нападот, благодарение на техничките грешки, македонските ракометари не успеаја да создадат предност поголема од два гола.

По паузата меѓу двете полувремиња избраниците на Ивица Обрван ја најдоа вистинската игра и во нападот. Благодарение на добрата игра во одбраната, во почетните две минути од вториот дел, македонските ракометари постигнаа лесно три гола и стигнаа до предност од четири погодоци (11-15).

Разликата од четири голови Македонија без премногу проблеми ја одржа до крајот на натпреварот за конечната победа. Македонската репрезентација, иако мечот се играше во Цирих, имаше огромна поддршка од трибините.

Последниот натпревар во квалификациската група, Македонија ќе го одигра на 16.јуни, кога во Скопје ќе гостува Португалија.