1. Прескокни до содржината
  2. Прескокни до главната навигација
  3. Кон други страници на DW

Клучна фаза за иранската нуклеарна програма

БГ/макфакс19 ноември 2013

Американскиот државен секретар Џон Кери го повика Иран да го докаже цивилниот карактер на нуклеарната програма. Преговорите продолжуваат в среда.

https://p.dw.com/p/1AKZo
Фотографија: Reuters/Jason Reed

Американскиот државен секретар Џон Кери го повика Иран во понеделникот на финализирање на договорот со кој на целиот свет ќе му покаже дека неговата нуклеарна програма се користи во мирољубиви цели, но рече и дека нема особени очекувања кога станува збор за претстојните преговори во Женева меѓу големите светски сили и Техеран.

Минатата седмица висок американски функционер коментирајќи ги преговорите меѓу шесте светски сили и Иран изјави дека двете страни биле блиску до договор, меѓутоа изгледа дека државниот секретар на САД, Џон Кери ги намалува очекувањата за следната средба која започнува веќе на 20-ти ноември.

„Немам посебни очекувања од преговорите во Женева. Мислам дека ќе преговараме во добра верба, како и дека ќе се обидеме да постигнеме макар почетен договор“, рече Кери на прес-конференцијата одржана со турскиот министер за надворешни работи, Ахмет Давутолу.

Кери очекува Иран да ја сфати важноста од демонстрирање на подготвеноста да ги реализира документите со коишто на светот ќе му докаже дека работи на цивилна програма. „Немам намера да преговарам овде, во јавноста. Сите мораме да ги почитуваме туѓите ставови. Најдобро е преговорите да ги оставиме за на преговарачката маса“, изјави Кери одбивајќи да разговара за поединости.

Новиот круг од преговорите меѓу Иран и т.н. група пет плус еден, односно петте постојани членки на Советот за безбедност при Обединетите нации, САД, Русија, Кина, Велика Британија и Франција, плус Германија, под координација на високата претставничка на Европската унија за заедничка надворешна и безбедносна политика, Кетрин Ештон, ќе почне в среда во Женева. На нив ќе се настојува да се постигне почетен договор кој ќе овозможи ставање крај на десетгодишниот застој во преговорите за иранската нуклеарна програма.

Западот и Израел сметаат дека таа е насочена за изградба на нуклеарно оружје, додека Иран е упорен дека збогатувањето на ураниум му е неопходно за добивање електрична енергија и за медицински истражувања.