Клинтон се бори за реизбор на Обама

Извиците на воодушевување одвај запреа кога претседателот Барак Обама на вториот ден од партискиот конгрес на демократите во Шарлот, се качи на бината по говорот на поранешниот претседател Бил Клинтон и го прегрна срдечно. Знак на пријателство, но и на благодарност за силниот говор на Клинтон, во кој тој повика на реизбор на Обама.

Клинтон рече дека сака Обама побторно да биде претседател на САД и гордо го предлага за носител на стандардите на Демократската партија.

Клинтон ја стави сета своја политичка тежина на вагата. Тој ги фалеше економските успеси на Обама и го бранеше од нападите на републиканците.

„Го номинирам човекот кој спречи пад во економска депресија и не‘ изведе на патот на опоравување.“

„Состојбата е многу подобра“

Бил Клинтон е се‘ уште исклучително популарен во својата партија, но и надвор од нејзе. Тој ја искористи таа популарност и ја критикуваше економската програма на републиканците дел по дел. Обама, рече тој, ја презеде земјата во една многу тешка фаза:

„Слушнете ме сега - ниту еден претседател, ни јас, ниту кој и да е од моите претходници немаше да може да ги отстрани штетите кои ги најде Обама кога ја презеде функцијата.“

Состојбата е сега многу подобра, нагласи тој, претставувајќи го Обама како човек кој бара компромиси:

„Една од главните причини за реизбор на Обама е што тој е секогаш подготвен на конструктивна соработка. Тој назначи републиканци за министри за одбрана и за сообраќај, тој дури ја назначи и Хилари за министер за надворешни работи.“

Американците, како што нагласи Клинтон, се исправени пред јасен избор, односно мора да се прашаат во какво општество сакаат да живеат - во општество какво што сакаат републиканците и во кое победникот добива се‘ или во општество какво што си претставуваат демократите и во кое благосостојбата се дели?

Кавга околу локацијата

Барак Обама својот голем настап на конгресот на демократите го има денеска. Прво неговиот говор требаше да се одржи на стадион со 74.000 места, но поради невремето кое се заканува, Обама сепак ќе зборува во арена во која има место за 20.000 посетители. Републиканците ваквиот потег го толкуваат поинаку и тврдат дека промената на местото не е направена за да не се загрозува безбедноста на присутните, туку затоа што наводно стадионот немало да се наполни. Кавгата околу местото на одржување на говорот е најновата потврда на очекувањата дека оваа претседателска трка ќе биде тешка и ќе се води со сите средства.