Како до врвно спортско остварување?

Спортистите го кратат патот за подобрување на издржливоста. Во висински комори, на симулирана височина од 3 илјади метри и разреден воздух, може побрзо да се постигне ефект од тренингот.

„Квалитетот во светскиот врв е енормно висок - и без допинг. Затоа, ако можам да користам легални работи како висинска комора, криокомора и слично за да ги подобрам своите способности, тогаш треба и да го правам тоа“, вели Кристоф Цинер, натпреварувач во триатлон.

Дали со користење на дозволени методи, како висински комори, или со посегнување по забранети препарати од допинг-листата, целта на спортистите е иста: максимално можно самооптимирање.

„Имавме дискусија за тоа, дали има граници на способностите, граници на оптоварливоста. Се разбира дека има граници; проблем е само што не ни се познати“, вели професорот Јоахим Местер, експерт за тренинг.

Мускулите можат да се управуваат, веројатно и да се манипулираат, и со ментални средства.

Но, во колкава мера психо-трикови, како транс или хипноза, можат да помогнат да се надминат природните граници на организмот за време на натпреварот?

„Тоа всушност воопшто не е потребно. Често пати е доволно спортистите и на натпреварот да го постигнат она, што редовно го постигнуваат на тренинзите. Тоа им успева само на околу 30 проценти“, вели д-р Жанин Олерт .

Во поново време имаше интересен развој во пливањето - со забраната за користење костими за целото тело, кои ја зголемуваа брзината, Светската пливачка асоцијација го прекина ловот на рекорди генерирани од високата технологија. Фокусот сега повторно е врз спортистите, односно од материјалот се сврти кон човековото тело.

А тоа може да влијае и врз методите за допингување.

„Трендот го гледам можеби во обиди да се работи со супстанци од сопственото тело, сопствен тестостерон или хормони за раст, потоа во обиди за помало дозирање и поточно планирање кога може да се употребат одредени работи во фазата на тренинг, а не мора да се смета на контроли“, вели биохемичарот проф. Вилхелм Шенцер.

На олимписките игри во Лондон ќе бидат извршени шест илјади допинг-контроли. Но, менталниот и физичкиот тренинг за олимпијадата фактички за најголемиот дел од учесниците веќе одамна е завршен - со дозволени или со недозволени средства.