Италија - бројот на жртви во земјотресот достигна 16 луѓе

Бројот на жртвите во земјотресот кој вчера го погоди североисточниот дел на Италија се искачи на 16 луѓе, а повеќе од 350 се повредени. Уште едно лице се води како исчезнато, соопштија властите. Околу 14 илјади луѓе останале без своите домови, кои се урнаа во вториот по ред поголем потрес во овој дел на Италија. Поголемиот дел од граѓаните ноќта ја минаа во своите автомобили или под отворено небо.

Спасувачки тимови се уште работат на расчистување на урнатини, јавуваат италијански медиуми.

„Последиците од земјотресот ќе бидат долготрајни и не можеме да исклучиме дека ќе дојде до посилни потреси“, изјави Стефано Греста, директор на Националниот институт за геофизика и вулканологија.

Во изминатите десет дена регистрирани се најмалку 800 послаби потреси во тој регион. Последен пат земјотрес со интензитет од 6,3 степени по Рихтер го разурна градот Аквила во централна Италија во 2009-та година, при што загинаа околу 300 луѓе.