Испораката на оружје за сириските бунтовници ја подели ЕУ
27 мај 2013Спорот околу можната испорака на оружје за бунтовниците во Сирија е главна тема на средбата на министрите за надворешни работи денеска во Брисел. Времето притиска оти на 1. јуни истекуваат досегашните санкции против Сирија.
Во моментов во ЕУ во сила е ембаргото за испорака на оружје. Тоа важи како за режимот на претседателот Башар ел Асад, така и за бунтовниците и може да биде продолжено само едногласно. Но, пред се' Велика Британија бара да се дозволи испорака на оружје за бунтовниците. Повеќето други ЕУ - држави го отфрлаат ова. Тие стравуваат дека на тој начин би можело да биде поттикната граѓанската војна во Сирија.
Според проценките на ЕУ - дипломатите, целосно е нејасно дали министрите ќе најдат компромис за продолжување на санкциите за Сирија и како тие би можеле да изгледаат.
Владата во Дамаск сега очигледно е подготвена да учествува на меѓународната конференција за Сирија во Женева. Ова го најави министерот за надворешни работи Валид Муалем при посетата на ирачкиот главен град Багдад.