Исламскиот свет се дистанцира од Сирија
16 август 2012Организацијата за исламска соработка на самитот во Мека, Саудиска Арабија, донесе одлука за привремено исклучување на Сирија од своите редови. Во организацијата членуваат 56 држави и палестинските автономни власти. За донесување на одлука за замрзнување на членството на некоја држава е потребно двотретинско мнозинство.
Суспендирањето на Сирија беше образложено со насилното постапување на сирискиот претседател Башар ал Асад против бунтовниците во неговата земја. Во завршната декларација се истакнува и неуспехот на планот од шест точки на ОН и Арапската лига, кој беше изработен со посредство на Кофи Анан. Учесниците на средбата во Мека изразија длабока загриженост од масовните убиства и нечовечките дејствија, насочени кон сирискиот народ. Тие се согласија за „неопходноста од неодложно ставање крај на насилството во Сирија“.
Жестока дискусија
Инаку пред гласањето за завршната декларација зад затворени врати се одвивала жестока дебата меѓи приврзениците и противниците на предлогот за суспендирање на членството на Сирија. Најактивно против предлогот реагирал главниот сојузник на Сирија, Иран, кој во Мека бил претставуван од претседателот Махмуд Ахмадинеџад, како и Алжир, изјавија дипломатски извори за светските новински агенции.
Генералниот секретар на ОИС Екмеледин Исаноглу ја оцени одлуката за замрзнување на членството како „силна порака, испратена од муслиманскиот свет до сирискиот режим“. Тој истакна дека не забележал на форумот голема поддршка за идејата за надворешна интервенција во Сирија.
Замрзнувањето на членството на Сирија во ОИС ќе ја зајакне изолацијата на сирискиот режим. Арапската лига веќе го замрзна членството на Дамаск во ноември минатата година во знак на протест против употребата на сила против опозицијата.