Жртви при судир во мексикански затвор

Властите на сојузната држава Сан Луис Потоси соопштија дека во една затворска институција во истоимениот главен град во раните утрински часови избила пресметка, во која учествувале најмалку 100 затвореници.

Полицијата и армијата до претпладнето во затворот, кој се наоѓа на 400 километри северно од Мексико сити, повторно ја ставија ситуацијата под контрола, се вели од официјална страна. Затворениците се спротивставиле еден на други со остри предмети и друго импровизирано оружје. Причина за судирот била група затвореници, кои ги ограбувале и шиканирале другите затвореници. Постoи можност некаква улога да имаат и ривализираните банди со дрога, но тоа засега е неизвесно.

Мексико, каде голем број банди со дрога се инволвирани во борбите, изминатите години беше соочено со бран насилства. Во мандатот на поранешниот претседател Фелипе Калдерон во периодот меѓу 2006 и 2012 година беа убиени најмалку 70.000 луѓе. Околу 27.000 Мексиканци се’ уште се водат за исчезнати.

Калдерон целно ја ангажираше војската, за да ја уништи моќта на ривализираните картели за дрога во земјата. Откако претседателот Енрике Пена Нието ја презема власта, убиствата се намалија за 14 проценти. Според статистиката на владата, во последните четири месеци во Мексико загинале околу 4.250 лица поради организираниот криминал.