Жртви и ранети во терористичкиот напад во Анкара
20 септември 2011Експлозијата избувнала во центарот на турскиот главен град Анкара во непосредна близина на средмно училиште, во дел од градот во кој се наоѓаат и голем број владини објекти.
Надлежните оценија дека станува збор за терористички напади, но засега никој не ја презеде одговорноста.
Сомневањата се дека зад нападот стојат курдски бунтовници. Веднаш по експлозијата, полицијата привела една жена која во непосредна близина на местото на нападот извикувала „да живее нашата борба“.
Нападот бил изведен со паркиран автомобил од кој бил активиран експлозивот. Според истрагата, автомобилот бил купен пред една недела и не бил регистриран. Пожарот кој го предизвикала експлозијата зафатил и други возила и објекти во близина. Најмалку три лица ги загубиле животите, а 36 во моментот се водат како повредени.
Курдските бунтовници кои се борат за автономија во југоисточна Турција во последниот период ги засилија нападите врз цели во Турција. Во минатото слични напади извршуваа и радикални левичари и исламисти.
Властите ги обвинија курдските бунтовници и за нападот изведен на 28 август годинава во туристичкиот центар Кемер, во кој беа повредени 10 луѓе. По ескалацијата на судирите, турската армија на почетокот на месецов ги бомбардираше засолништата на курдските бунтовници во северен Ирак, на границата со Турција.
Автор: БГ/ап
Редактор: Жана Ацеска