Дојче банк со големи загуби

За целата 2013 година останува остаток од 1,1 милијарда евра, половина од она што аналитичарите очекуваа од најголемата банка во Германија. Двоецот на чело на Дојче банк, Аншу Џеин и Јирген Фичен истовремено ги подготвуваат акционерите за уште полоши вести во оваа година.

„Очекуваме 2014. година да донесе нови предизвици и нивно дисциплонирано совладување. Но, уверени сме дека во 2015. година ќе ги постигнеме поставените цели“, соопштија двајцата први менаџери на Дојче банк.

2013. година е втора по ред во која банката вложува во идниот растеж, како и во идното јакнење на контролата, но и се справуваше со старите оптоварувања.

Разочарувачкиот годишен биланс, соопштен денеска, на пазарот на акции не беше примен најдобро. Акциите на Дојче банк на Дакс забележаа минус од четири проценти.

Една од причините за големите загуби на Дојче банка лежи во последиците на финансиската криза: за правни спорови банката само лани плати 2,5 милијарди евра, откако постигна неколку скапи порамнувања. Само во декември Дојче банка мораше да плати 1,4 милијарди евра на американската државна служба ФХФА поради спорните хипотекарни бизниси во САД. Освен тоа, Европската комисија изрече казна од 725 милиони евра за Дојче банк, поради недозволено постигнување договор за висината на каматите во прометот меѓу банките, Либор.