Должничката криза ја кочи германската економија
15 јануари 2013Германското стопанство лани забележало раст од 0,7 проценти, соопшти денеска (15.01) Сојузната служба за статистика во Визбаден врз основа на нецелосните податоци. Тоа е значително помалку во однос на 3-те проценти раст на брутодомашниот производ на земјата во годината претходно. Но, сепак, Германија и со овој показател се наоѓа во подобра позиција од многу европски партнери кои западнаа во рецесија.
На влијанието на должничката криза не можеше да му се спротивстави целосно ниту извозно ориентираното германско стопанство. По силниот почеток во првата половина на годината, развојот на најголемата европска економија се намалуваше од квартал во квартал.
За 2013 година економистите сметаат на уште една кочница, зашто несигурна е ситуацијата и на најважниот, американскиот пазар. Најголем број од економските експерти за германското стопанство очекуваат дури и помал развој отколку минатата година. Прогнозите се движат меѓу 0,3 до 1 процент.
Минатата година германската економија профитираше јасно од робустната конјуктура, во буџетите на државата и покраините дури имаше и вишок собрани пари над издатоците. Со тоа германската држава забележа вишок од 0,1 процент, а дефицитот од 0,8 насто е далеку од дозволените 3 проценти според правилата за ЕУ од Мастрихт.
Потрошувачките цени во Германија лани пораснале за 2 проценти, а стапката на инфлација е под онаа од 2011 година, кога изнесуваше 2,3 проценти.