Насилни демонстрации

Демонстрациите против владата на Тајланд сѐ повеќе стануваат насилни протести. Викендов се убиени четири лица, соопштија властите во главниот град на Тајланд, а повеќе десетици се повредени. Опозиционерите денеска (01.12) повторно се обидоа да навлезат во централата на владата. Полицијата употреби солзавец. На улиците се испратени и голем број војници.

Противниците на премиерката Јунгланг Шинаватра се обидуваа повеќе часови да ги срушат барикадите и да го пробијат силното обезбедување на зградата на владата. Силите за безбедност меѓутоа ги одбиваа нападите. Владата ги демантираше гласините според кои премиерката Јинглак Шинаватра избегала од земјата. Непознато е каде се наоѓа таа.

Денеска меѓутоа Шинаватра мораше да биде заштитена од разгневените демонстранти и да биде засолнета на безбедно место. Според податоци на соработници на нејзината канцеларија демонстранти навлегле во просторот на еден спортски клуб на полицијата, каде се наоѓала Јинглак. Таа го напуштила објектот и била пренесена на друго место.

Јинглак Шинаватра е сестра на поранешниот премиер Таксин Шинаватра, кој во 2006 година беше соборен од власта поради обвинувања за корупција. Демонстрантите ја обвинуваат Јинглак дека била само марионета на брат ѝ, кој се наоѓа во егзил, и бараат нејзина оставка.