Движењето „Окупирај“ го одбележа јубилејот со демонстрации

Учесниците на демонстрациите се собраа во парк во близина на берзата, кадешто движењето, кое е критички настроено кон капитализмот, настана пред една година. Сепак, протестите овој пат беа значително помали во споредба со тогаш. Полицијата имаше голем број свои припадници на местото на настанот и според сопствени наводи уапсила 135 лица. Голем дел од демонстрантите се обидуваа да влезат во берзата, но без успех. Тргувањето на берзата не беше попречено од протестите.

Демонстрантите упатија голем број барања, од она за зголемување на даноците за богатите и затегање на финансиската регулација, па се до забрана за нафтени ископувања на Аљаска и спасување на белите мечки.

Десет месеци камп на движењето „Окупирај“ имаше и во Франкфурт, пред седиштето на Европската централна банка. Кампот е растурен во август, по еден правен спор. Во времето на растурање на кампот таму се наоѓаа околу 80 луѓе. Градот го образложи растурањето на кампот пред се‘ со лошите хигиенски услови во него.