Двајца неонацисти загинаа при напад на „Златна зора“

Грчкиот министер за здравство Адонис Георгијадис соопшти дека при атентатот во Атина се убиени две момчиња, а трето лице е тешко повредено. Двајцата напаѓачи отвориле оган кога со мотоцикл минувале покрај партиската централа на „Златна зора“, по што побегнале. Мотивите за нападот не се познати. Досега грчката полиција нема траги кои би ја одвеле до извршителите на нападот. Балистичката истрага покажа дека оружјето од коешто е пукано, автоматски пиштол од типот Застава, досега никогаш не е користен при терористички напад или грабеж, јави државното радио, повикувајќи се на извори во полицијата.

Златна зора издаде две соопштенија, обвинувајќи ги „терористите“ „анти- грчката Влада на Самарас“ и „лично“ министерот за јавен ред Никос Дендијас за смртта на своите членови. Екстремистичката партија тврди дека побарала полицијата да ги заштити нивните партиски канцеларии. Полициската заштита на Златна зора и‘ беше укината во септември, кога нејзиниот лидер Никос Михалолијакос и неколку пратеници беа обвинети дека се членови на криминална организација по убиството на раперот Павлос Фисас.

Синоќешниот напад го осудија сите парламентарни партии, а портпаролот на Владата Симос Кедикоглу вети дека убијците ќе бидат фатени. „Нема да дозволиме државата да се претвори во бојно поле за израмнување на сметки од каков било вид“, рече Дендијас, додека во грчката јавност се стравува дека пукањето може да предизвика бран одмазднички напади.