Груевски ќе разговара со Филе

Портпаролот на еврокомесарот Филе, Петер Стано, пред два дена најави дека главна тема на средбата ќе биде Извештајот за напредокот на Македонија на патот кон ЕУ:

„Со оглед на тоа што овој состанок доаѓа десет дена по објавувањето на прогрес-извештаите на Европската комисија за земјите- кандидати и потенцијални кандидати за членство во Европската унија, природно е дека главна тема на оваа дискусија ќе биде извештајот за Македонија, односно наодите и препораките од истиот. Ќе се разговара за содржината на прогрес-извештајот и предизвиците што не очекуваат, пред сѐ што ќе треба да стори Македонија и што ЕК може да направи во продолжувањето на поддршката на Македонија на нејзиниот европски пат“, изјави Стано за МИА.

Според него, неизбежна тема на средбата ќе биде и спорот за името:

„Прашањето за името е блиску поврзнао со пристапниот процес што го ставивме и во заклучоците и препораките во извештајот. Ние го повторивме нашиот предлог кога станува збор за отворање на пристапните преговори и решение за прашањето за името. Се разбира дека ова отворено прашање и преговорите се поврзани едно со друго и ова се разбира дека ќе биде дел од дискусијата меѓу Филе и Груевски.“

Гласноговорникот на еврокомесарот за проширување, потврди и дека на маса на разговорите ќе се најдат и последните случувања во Македонија и високата затворска казна за новинарот Томислав Кежаровски, за што загриженост пројави и еврокоемсарот Филе.

„Не би сакал да навлегувам во конкретни детали и теми за кои ќе разговараат, што е до нив, но секој состанок меѓу комесарот Филе и неговите партнери е исто така и можност за да дискутираат за последните случувања и настани што се важни за односите меѓу ЕУ и земјата за која станува збор и нејзината европската агенда. Се разбира, може да се очекува дека во петок ќе се допре и темата за последните случувања во земјата што влијаат на европските норми и нивното исполнување“, рече Стано.