Гроф Ламбсдорф задоволен од напредокот на Македонија

МНР соопшти дека во разговорот биле реафирмирани добрите билатерални односи меѓу двете држави и нагласен заемниот интерес и заложба за продолжување на активен политички дијалог и интензивирање на меѓусебната соработка.

Во контекст на евроинтеграциите на Република Македонија, министерот Попоски го запознал соговорникот со реформските процеси, особено за постигнувањата со Патоказот на акции и мерки во имплементацијата на приоритетите од Пристапниот дијалог на високо ниво, кои се дефинирани заедно со Европската комисија, како и за македонското претседавање со Процесот за соработка на земјите од Jугоисточна Eвропа, кое започна во јуни годинава.

Германскиот дипломат го реафирмира ставот на Сојузна Република Германија во однос на евроатланските аспирации на Република Македонија. Тој ги поздрави видливите резултати од спроведените реформи одредени во Пристапниот дијалог на високо ниво, како и резултатите од вкупните реформски процеси кои се спроведуваат во земјата. На средбата беа разменети мислења и за ситуацијата во регионот и други актуелни меѓународни прашања, се наведува во соопштението од МНР.