Град, лето, плажа

Прстите се закопани во песокот, на шанкот чека коктелот, а водата убаво се прелева - чувството на одмор навистина може да се доживее среде голем град, како овде во Берлин. Додека Германија оваа година навистина долго чекаше да дојде летото, сезоната на „бичбарови“ во европските метрополи одамна е отворена. Она што денес е тренд, пред 13 години беше новина...

Летото 2002-ра градоначалникот на Париз Бертран Делано издаде налог да бидат донесени повеќе илјади тони песок на централната улица Жорж Помпиду и 3,5 километри од брегот на Сена го претвори во урбана оаза. Тоа беше толку добро прифатено од граѓаните, што оваа акција се повторува секоја година - се разбира само на лето.

Истата година и германскиот главен град Берлин довезе тони песок во паркот Монбижу. Таму никна барот „Strandbar Mitte“ - директно наспроти историскиот музејски остров. „На нашите гости сакаме да им понудиме релаксација на вода во убава атмосфера“, вели шефот на барот Кристијан Шулц. По него во Берлин беа отворени и други „бичбарови“.

Многу модерни барови на градските плажи се ориентираат според трендовите во Азија и на Карипските острови. Тие го отсликуваат чувството на одмор во денешниот глобализиран свет -палми, бел песок и егзотични пијалоци. Палетата на понуди е широка, за сечиј вкус - од сосема едноставни до луксузни барови.

Уште кон крајот на 18. век познатиот германски поет Јохан Волфганг Гете опеа дека треба само да се завртиш околу себе, за да ја доживееш среќата: „Научи да ја дофатиш среќата. Среќата е секогаш тука“. Во Келн среќа значи поглед кон катедралата. Срце, што сакаш повеќе?!

Во и околу Хамбург има многу вода, но таа е загадена поради пристаништето и водниот сообраќај, како на Елба, така и на Алстер. Затоа е поубаво разладувањето на базен на градската плажа, особено кога пред очи се има ваква панорамска слика: Елба, на чиј раб крановите ги претовараат бродовите.

Урбаната верзија на „бичбаровите“ значи дека не мора по секоја цена во близина да има море, река или езеро. Шармот на овој бар е во височините и погледот врз стариот град на Хановер. Едноставно една кратка пауза за душа, бегство од врвулицата на секојдневието, или поинаку кажано: Препушти му се на животот и слаткото денгубење.

Овде, во Штутгарт, погледот не е убав, но местото во секој случај е необично. Овој „бичклуб“ се наоѓа на покривот на еден паркинг. Овде луѓето може да се одморат по напорните шопинг-тури. Возрасните ги очекуваат коктели, а децата гребленца и лопатки во песокот - главно сите да се задоволни.

Исто така и во другите европски метрополи баровите на градските плажи се омилени. Во Брисел, седиштето на ЕУ, угостителите се обидуваат да привлечат цели семејства со разни спортски понуди, игри на вода, музика, храна и анимација за децата. И тоа успешно: Во меѓувреме градската плажа по должина на каналите е дел од бриселското лето.

Кој ќе погоди за која метропола станува збор? Ова е Виена. Овој „бичбар“ се наоѓа директно на Дунав. Нозете в песок, а главата во облаци - вака, барем за кратко тука може да се остават зад себе секојдневието и проблемите. И зошто да не?! Оти едно се знае: Зимата во Европа ќе дојде, сигурно!