Големи очекувања, разочарувачки почеток
8 јануари 2008Прв сведок беше Канаѓанецот Иан Смајли, кој како член на експертска комисија во 2001-ва година поднесе извештај во Советот за безбедност на ОН за трговија со дијаманти и оружје во Западна Африка. Обвинителството за уводот очигледно избра погрешен сведок и погрешен застапник на обвинението - судијата повеќе пати ги опоменуваше да бидат поконкретни, оти исказите и прашањата беа премногу неодредени и општи.
Таквиот тек на процесот обвинетиот Чарлс Тејлор го следеше очиглредно забавувајќи се. Тој самоуверено и влезе во преполнетата судска сала делејќи насмевки и бакнежи на присутните.
Жртвите на крвавата граѓанска војна во Сиера Леоне беа застапени само со исечоци од американски документарен филм од 2006-та година, во кои еден работник опишува што правеле бунтовниците од Обединетиот револуционерен фронт при нападот врз неговото село: „Прво ми ја положија оваа рака и ја отсекоа, а потоа ја отсекоа исто така и другава“.
Во наредните осум до десет месеци обвинителството има намера да повика 77 сведоци и жртви на злосторствата, како и 59 други лица од потесното опкружување на обвинетиот Тејлор. Тие треба да покажат дека тој како претседател на Либерија со пари, оружје и добро обучени убијци ги подржувал бунтовниците во соседната земја Сиера Леоне во борбата за власт и за природните резерви на дијаманти. Тејлор, според обвинението, притоа профитирал од зделките со крвавите дијаманти.
Само во периодот од 1996-та до 2002-ра, на кој се однесува обвинението, од теророт на бунтовниците настрадале повеќе од 22 илјади луѓе.
Лутгер Кажмјерчак