Германија ќе стави дополнителен потпис за Сирија

Германскиот министер за надворешни работи Гидо Вестервеле на маргините на дводневната средба со своите колеги од ЕУ, која се одржува во Вилнус, прекумерно и со патос го пофали европскиот став во однос на сириското прашање, употребувајќи ги термините „извонредно и многу мудро“. Со оглед на постигната заедничка позиција на ЕУ-државите, канцеларката Ангела Меркел и тој решиле да ја поддржат и дополнително да ја потпишат и декларацијата на Г20 за Сирија. Во декларацијата, прифатена од 11 членки на Групата 20 светски најважни економии, меѓу другото е побаран јасен меѓународен одговор на извршената употреба на хемиско оружје против цивилите во Дамаск.

Тоа го предвидува и позицијата на ЕУ: членките заеднички се заложија за „јасен и силен одговор“ на употребата на хемиско оружје, соопшти високиот претставник на УНијата за надворешна политика, Кетрин Ештон во литванската престолнина Вилнус, каде се одржува дводневната средба на шефовите на дипломатиите на ЕУ-државите.

Да се сочека извештајот на ОН

Ештон во името на министрите за надворешни работи ја поздрави најавата на Франција, пред евентуалниот воен напад врз режимот на сирискиот претседател Башар ал-Асад да се сочека извештајот на ОН за користењето отровен гас во Сирија. ЕУ тоа би го сакала и од американскиот претседател Барак Обама. Но, неговиот министер за надворешни работи, Џон Кери, при краткиот престој меѓу своите европски колеги и размената на мислења во Вилнус, не можеше да даде такво ветување. Кери сепак покажа разбирање за воздржаноста на Европејците, а сега ќе се советува со Обама, пренесе германскиот министер Вестервеле.

Обама во своето неделно радио-обраќање одново изврши притисок врз Конгресот да даде согласност за воен напад врз Сирија. Парламентарците в понеделник се враќаат од летната пауза, а за во вторник е најавено обраќање на Обама до нацијата.