Германија има суфицит во јавните финансии

Германските јавни финансии се вратија во позитива во првите шест месеци од годинава, и покрај последиците од кризата во еврозоната кои ги чувствува и најголемата европска економија. Сојузниот завод за статистика соопшти дека до јуни годинава, јавните финансии во Германија забележале позитива од 8,3 милијарди евра, што е околу 0,6 проценти од брутодомашниот производ.

Сепак, големата позитива во државната каса се должи пред се’ на помалите трошоци за социјалните каси, поради постојаниот раст на вработеноста, со што е забележан суфицит од повеќе од 11 милијарди евра. Позитивата во овој сектор далеку го надминува дефицитот од 3,3 милијарди евра кој го бележат сојузните, регионалните и општинските буџети.

Проценка на експертите е дека Германија успева да ја преброди големата должничка криза во еврозоната, каде голем број земји се веќе западнати или се на работ на рецесија, пред се’, благодарение на длабоките структурни реформи, кои беа изведени во земјата пред повеќе години од страна на претходната влада.

Со оглед на поволната економска состојба во Германија, државните приходи во првите шест месеци се зголемиле за 2,9 проценти, а потрошувачката за само 0,8 отсто.