Г.г. Стефан: Не се поставуваат услови уште пред да почнат разговорите

Поглаварот на МПЦ, г.г. Стефан во Божикното интервју за Македонската информативна агенција – МИА, нагласува дека Македонската православна црква (МПЦ) е возобновителка на Охридската архиепископија (ОА), не е новонастаната Црква. Иако со де јуре прекинат континуитет, сепак, де факто таа секогаш постоела, живеејќи во срцата и мислите на Македонецот и сите православни од овие наши простори, вели тој.

Во врска со тоа дали има најави за продолжување на дијалогот меѓу МПЦ-ОА и Српската православна црква имајќи ја предвид изјавата на српскиот претседател Томислав Николиќ за време на неговата неодамнешна посета на Македонија, дека е подготвен да се ангажира, г.г. Стефан вели: „Најпрво ние црковниците би требало да се подзамислиме кога државници и пред нас и повеќе од нас ја согледуваат потребата од побрзо надминување на спорот и потребата двата народи, српскиот и македонскиот, да живеат како што им доликува на православни народи“.

Светиот архиерејски синод, како што вели поглаварот на МПЦ, го оцени ангажманот на претседателот Николиќ како добронамерен и добредојден и потенцираше: „Секогаш сме подготвени и за дијалог и за решение“.

„Нашата конструктивност за решавање на овој спор кој никому не е од корист, ја покажавме секогаш во минатото, но ја докажавме и веднаш по оваа најнова иницијатива – испративме писмо до Саборот на СПЦ со подготвеност да седнеме и да разговараме. Но, мора да се знае дека кога се пристапува во решавање на еден ваков спор, не е ниту дипломатски, ниту е во согласност во правилата, да се поставуваат услови и барања пред разговорите да почнат“, вели поглаварот на МПЦ-ОА.