Гаук бара поголема заштита за бегалците

По бегалската драма на Лампедуза германскиот претседател Јоахим Гаук упати апел до ЕУ за подобра заштита на бегалците. Да се штитат животи и да се има слух за бегалците е значајна основа за владеењето на правото и на вредностите, рече Гаук при доделувањето на Ордените за заслуга на Сојузна Република Германија во Берлин.

„Оние што бараат прибежиште се луѓе и, како што покажа и вчерашната трагедија, се посебно ранливи луѓе. Ним им е потребна заштита. Да се затворат очите и да се допушти да впловат во една однапред предвидлива смрт е непочитување на нашите европски вредности“, рекол Гаук според манускриптата од говорот.

Претседателот на одборот за човекови права во Бундестагот, Том Кенигс и‘ префрли на ЕУ дека не се ангажира. Овој политичар од редовите на Зелените за германската телевизија НДР изјави дека катастрофата „можела да биде избегната и морала да биде избегната“. Тој ја обвини Европската унија дека се концентрира само на заштита на границите и се заложи да се формираат институци кои ќе организираат спасувачки акции при опасност од бродолом. Освен тоа, организаторите на овие акции би морале построго да се казнуваат. Овој политичар обвини дека тоа е „повреда на човекови права, која Европа не смее да си ја дозволи“. Кенингс исто така смета, Германија како силна членка на ЕУ би морала да поттикне иницијатива за заштита на бегалците.

Со жалење, гнев и негодување поради несреќата реагираше и организацијата „Про азил“ на несреќата: „Европа ги затвора своите граници и потоа, кога стануваат видливи последиците од изградбата на тврдината (Европа, н.з.), глуми погоденост“, изјави Гинтер Буркхарт, од „Про азил“.

Пред италијанскиот остров Лампедуза вчера (03.10) потона бегалски брод со повеќе од 500 луѓе. Се стравува дека во несреќата животот го загубија повеќе од 300 луѓе.