Во пожар во Аризона загинаа 19 пожарникари
1 јули 2013Најмалку 19 пожарникари од елитната единица на државата Аризона загинаа при гасење на брзо движечки пожар, што уништи 200 куќи и доведе до евакуирање на два мали града североисточно од државната престолнина Феникс.
Ова е најголем број жртви меѓу пожарникари при гасење на единечен пожар во САД во последните 80 години. Во 1933 година 29 пожарникари загинаа во пожарот во градскиот парк Грифит во Лос Анџелес.
Загинатите биле дел од специјално обучен одред, што вообичаено пристигнува прв на местото на пожарот и помага во ограничување на неговото ширење. Тие презеле мерки за ограничување на пожарот, но расположливата опрема не ги задржала силните пламени јазици, откако силните ветрови драстично го промениле правецот на пожарот. Пожарникарите кои пристигнале подоцна не успеале да ги спасат своите колеги.
Претседателот на САД Барак Обама им ирази сочувство на семејствата на 19-те загинати пожарникари. Тој изјави дека пожарникарите биле херои и високо квалификувани професионалци, кои според негови зборови „застанале на патот на смртната опасност, за да ги заштитат животот и сопственоста на своите сограѓани, со кои никогаш нема да се сретнат“.
Пожарот во Аризона избувна во момент на рекордно високи температури во западниот дел на САД, регистрирани за време на викендот. Во Долината на смртта во државата Калифорнија е регистрирана температура од 54 степени.