Во Либија убиен американскиот амбасадор

Американскиот амбасадор во Либија и тројца службеници на американскиот Стејт Департмент ги загубија животите во нападот врз конзулатот на САД во либискиот град Бенгази. Поголема група вооружени луѓе ја нападнале зградата со гранати и автоматско оружје, а потоа и ја запалиле. Обезбедувањето на објектот возвратило на огнот, но според изјавите на либиски претставници, напаѓачите биле бројчано надмоќни. Амбасадорот и неговите соработници биле убиени откако врз нивното возило била испукана ракета во моментите кога ја напуштале зградата.

Американската државна секретарка Хилари Клинтон го осуди нападот.

„Некои се обидуваат да го оправдаат овој ужасен акт со предизвикувачки материјал поставен на интернет. Но, нема оправдување за ваков напад“, рече Клинтон.

Филмот кој ги предизвика протестите е дело на 56- годишен американски државјанин со еврејско потекло, Сем Бациле. Во филмот пророкот Мухамед е претставен како неморална личност, која дозволува сексуална злоупотреба на деца. Анти-исламистот Бациле во меѓувреме го напуштил својот дом и се крие на непозната локација. Во изјава за агенцијата Асошиејтед Прес тој вели дека исламот е болест, а со неговиот филм сакал да испрати политички став.

На нападот во Либија, вчера му претходеа и протести во Египет од истата причина. Исламски демонстранти успеаја да влезат во американската амбасада во Каиро, каде го симнаа и го запалија американското знаме, а на негово место поставија исламски симбол.

На ѕидот на амбасадата со спреј била испишана паролата: „Ако вашата слобода на говорот нема граници, тогаш прифатете ја нашата слобода на дејствие“.

Голем број демонстранти и во текот на ноќта останале пред ѕидовите на амбасадата, но обезбедувањето на објектот во меѓувреме е драстично зголемено.

Инцидентите станаа тема и во американската предизборна кампања, откако кандидатот на републиканците Мит Ромни го нападна претседателот Барак Обама дека наместо да го осуди инцидентот и да ги гони сторителите, тој изразил симпатии со напаѓачите. Од Белата куќа изразија шокираност поради тоа што Ромни се одлучил да ја злоупотреби трагедијата за политички напади.