Бугаринот денес живее подобро?
30 август 2012Дали бугарскиот стандард оди по нагорна линија? Економистите категорично одговараат со ДА, наспроти проблемите што ги носи кризата. Руслан Стефанов од Центарот за следење на демократијата вели дека кризата предизвикала кратење на приходите, но ако најдобрите години од социјализмот се споредат со актуелниот период на криза, ќе се утврди дека и покрај стегањето на ременот, се живее подобро, вели економистот Николај В‘лканов од Институтот за пазарна економија. Експертот цитира податоци од истражувања на институтот со кои прави споредба на стандардот на живеење во 1972 година, која се смета за „врвна точка“ на социјализмот и 2010 година, во која доходот на населението веќе почнува да страда поради кризата.
Од компот кон кашкавал
Институтот за пазарна економија располага со податоци за буџетот на бугарските домаќинства од 1925 година. Бројките велат дека во 1925 година градското население 43,4 проценти од своите приходи ги давало за храна. Во 2010 година, расходите за храна изнесувале 36,4 проценти. Пред 85 години менито на Бугаринот се состоело во основа од леб и млеко, а денес во топ-три производите се кашкавалот, пилешкото месо и печеницата.
Николај В‘лканов нагласува дека е факт оти социјализмот обезбедил многу подобар стандард на живот во споредба со царството Бугарија, но исто така е факт и дека во последните 20 години стандардот продолжил да се качува нагоре. Куповната моќ на Бугарите денес е поголема за 20-45 проценти во споредба со 1972 година.
Десислава Николова од Инситутот за пазарна економија дополнува дека бројките велат оти Бугарите се хранат побогато и поздраво и трошат помалку пари за храна. Таа тенденција е присутна и за стоки како облека и обувки. Но, истовремено, се зголемуваат расходите за стоки и услуги кои се исто така важен индикатор за стандардот - здравствени услуги, телекомуникациски услуги, хотелски ноќевања и друго. Се зголемуваат и расходите за комунални услуги, но тоа не е последица на зголемените приходи на граѓаните, туку повеќе на немањето конкуренција во тие сектори.