Бројот на „лажни азиланти“ се намалува
22 февруари 2013По редовниот состанок на мониторинг тимовите за земјите од Западен Балкан задолжени за следење на примената на безвизниот режим, генералниот секретар на Министерството за безбедност на БиХ, Бакир Даутбашиќ, за ДВ изјави: „Во овој момент не е доведен во прашање безвизниот режим за која било земја од Западен Балкан. Работите се поправаат кога е во прашање цел регион.“
Откако од земјите во регионот побараа заострување на мерките со цел да се спречат злоупотребите на безвизниот режим, некои од земјите на Шенген ги заострија, односно ги скратија своите процедури во обработката на барањата за азил, што дополнително придонесува за намалување на бројот на оние кои поднесуваат барања за азил првенствено поради материјална корист.
Што се однесува до ситуацијата со баратели на азил посебно во Германија, бројот на луѓе кои поднесле барања за азил се зголемува и тој во јануари изнесуваше повеќе од седум илјади. Според министерството за внатрешни работи во Берлин, тоа значи зголемување од околу 50% во споредба со претходниот месец. Сепак, како што се вели, во јануари не било забележано особено зголемување на бројот на подносители на азил од Србија, Македонија и Боса и Херцеговина. Во јануари во Германија се одбиени 1800 барања за азил.