Бесими на средби со високи претставници на НАТО

Како што е најавено и официјално македонскиот министер за одбрана Фатмир Бесими денеска (28.01) ќе се сретне со заменикот генерален секретар на НАТО, Александер Вершбоу, како и со помошникот генерален секретар на Алијансата задолжен за нов безбедносни предизвици, Габор Иклоди.

Во седиштето на Алијансата, тој ќе има средба и со американскиот амбасадор во НАТО, Иво Далдер, како и со турскиот амбасадор Хајдер Берк, чија земја е контакт амбасада на НАТО за Република Македонија. По овие средби, според најавите, македонскиот министер за одбрана ќе замине и во градот Монс на средба со Врховниот командант на Сојузничките сили-Европа, адмиралот Џејмс Ставридис.

Посетата на министерот Бесими е во функција на интензивната дипломатска активност на Македонија во европската престолнина, а во насока на лобирањето за земјата, претставувањето на постигнатите резултати во реформите во одбранбено-безбедносниот сектор, како и продлабочување на досегашната плодна соработка на Министерството за одбрана и АРМ. Најавено е дека на овие средби ќе бидат споделени предлози и мислења за престојниот ангажман на земјите членки на НАТО пост-Авганистан, а ќе биде искажана и подготвеност земјата да даде свој значаен придонес преку конкретни проекти и лица. Воедно, се очекува и да се разговара за интензивирање на регионалната соработка во областа на одбраната, која е приоритет за Министерството за одбрана за оваа година.