Бајер Леверкузен го отпушти тренерот Дут
1 април 2012Судбината на Робин Дут кој го предводеше тимот на Бајер Леверкузен од почетокот на актуелната сезона беше запечатена со вчерашниот пораз на домашен терен од аутсајдерот Фрајбург со 0:2 .
Со тоа актуелниот вице-првак може да се каже дефинитивно се прости од амбициите за настап во Лигата на шампионите во наредната сезона (до кој директно водат првите три места на табелата во Бундеслигата а четвртото може да води преку дополнителни квалификации). Со четвртиот пораз по ред (што е нов негативен рекорд за клубот) во прашање е доведена и минималната цел сезонава- настапот во Лига Европа.
Навивачите на Бајер Леверкузен го сметаа токму тренерот Робин Дут за главен виновник за серијата порази и на мечот со Фрајбург гласно бараа негово заминување и срдечно ја поздравуваа секоја успешна акција на гостинската екипа.
„Едноставно моравме да реагираме и да упатиме јасен сигнал за да можеме со свеж ветер и натаму да ја следиме целта на сезоната- настап во меѓународните натпреварувања“, изјави раководителот на спортскиот клуб од Леверкузен Вофганг Холцхојзер во образложението на долуката за отпуштање на тренерот Дут.
Притоа е најавено дека него на клупата до крајот на сезоната ќе го замени млад двоец составен од доскорешниот играч на Леверкузен, Финецот Сами Хипија како шеф на тимот и досегашниот предводник на составот до 19 години на Бајер- Саша Левандовски , како тренер на екипата.