„Ахтисари се заканува со празна пушка“

Прашан од загрепскиот Вечерњи лист да ја прокоментира изјавата на претседателот на Србија Томислав Николиќ дека нема да го признае Косово, дури ниту по цена неговата земја да не влезе во ЕУ, Ахтисари рече:

„Ако сакаат во Русија, нека одат таму. Никакви отстапки не се прифатливи, ниту во Босна и Херцеговина, ниту на друго место“.

„На Србија не би требало да и’ се дозволи да влезе во ЕУ додека не го признае Косово. Србија одамна го загуби правото над Косово. Таа долги години лошо се однесувала кон косовските граѓани“, рече Ахтисари, добитникот на Нобеловата награда за мир.

Според него, земјите членки на ЕУ кои го немаат признато Косово, како што се Шпанија, Романија, Грција, Словачка и Кипар, и’ помогнале на Србија во нејзините напори. „Но, уверен сум дека тиа многу брзо ќе се промени“, додаде Ахтисари.

Тој изрази уверување дека „наскоро и стотата земја ќе го признае Косово“. Во текстот се потсетува дека досега независноста на Косово ја призна 91 земја во светот.

Политиката „ЕУ нема алтернатива“ е завршена

Претседателот на Демократската партија на Србија Воислав Коштуница денеска ја оцени изјавата на Ахтисари како закана со празна пушка.

Во изјава за агенцијата Бета Коштуница оцени дека Уставот на Србија е „непробијна брана“ за независноста на Косово и оти не ни помислува дека тој би можел да се промени се’ додека е загрозена целовитоста на земјата.

„Ние во вистински момент, во 2007-ма година, обезбедивме Советот за безбедност да го отфрли планот на Ахтисари и со никакви дополнителни уцени не може да се оживее проектот на Ахтисари Србија да го признае Косово“, рече Коштуница.

Тој додаде и дека ЕУ и нејзините членки се соочуваат со криза и оти е јасно дека ЕУ веќе нема толкава привлечна сила за граѓаните на Србија, како што имала, како и оти политиката „ЕУ нема алтернатива“ е завршена во Србија.