Асад: Сирија во состојба на војна
27 јуни 2012Видео објавено од опозиционерите покажува жестоки престрелки и експлозии во предградијата на Дамаск. Денеска во напад на сирискиот државен тв-канал Ал Ихбарија беа убиени три лица. Убиените се новинари и вработени во телевизијата.
„Имаме вистинска воена ситуација. Целокупната наша политика и сите сектори треба да бидат ставени во служба на извојување победа во оваа војна“, изјави Асад, кој негира дека во неговата земја се случува побуна против владеачкиот режим.
Таквата изјава дека Сирија е во војна ја менува реториката на Асад, кој долго време бунтот против него го оценуваше како работа организирана од милитанти финансирани од странство. Таквите активности тој и натаму ги оценува како терористички.
Тој повторно го обвини Западот, кој „зема и никогаш не дава и тоа е потврдено на секое ниво“. Во подолгиот говор насочен кон економските сектори, Асад ја повика владата да ги
зајакне односите со Истокот, а потесна соработка да направи и со земјите од Латинска Америка и Африка, како и Русија и Кина. Асад додаде дека „државата преку потпишување договори со овие земји треба да му помогне на приватниот сектор да изгради вистински односи со нив“.
Поради ескалацијата на насилството во Сирија, Русија – сојузникот на сириските власти, прифати да учествува на меѓународен состанок во Женева, кој треба да се одржи на 30-ти јуни. Сепак, рускиот претседател Владимир Путин побара и Иран, блискиот соработник на Асад, исто така да присуствува на собирот.
ОН ги обвинуваат сириските безбедносни сили за убиството на над 10.000 лица за време на конфликтот. Мировните набљудувачи од оваа организација веќе ги прекинаа активностите во земјата, поради премногу опасната ситуација во Сирија.