Арапската лига расправа за санкциите против Сирија
27 ноември 2011
На средбата на шефовите на дипломатии на земјите-членки на заедницата на арапски држави во Каиро ќе се разговара и ќе се гласа за планираното запирање на сите финансиски и трговски зделки со сириските власти на чело со претседателот Башир ал Асад, како и за замрзнување на нивните банкарски сметки. Покрај тоа треба да стане збор и за забраната за патување во арапските земји на високи претставници на сириското раководство и за стопирање на сите патнички и транспортни летови кон Сирија. Изземени од санкциите треба да бидат само прехранбените производи и медицинските средства наменети за населението во Сирија. За да бидат прифатени овие казнени мерки, за нив мора да гласаат две третини од 22 земји-членки на Арапската лига.
Властите во Дамаск во петокот (25.11.2011) го отфрлија и вториот ултиматум од Арапската лига да го запрат насилството врз цивилното население и да започнат преговори со опозицијата. Режимот на претседателот Башир Ал Асад со месеци наназад употребува насилство против демонстрантите и опозицијата во земјата. Според наводи на Обединетите нации, од почетокот на безредијата во Сирија се убиени повеќе од 3500 лица.
Автор:СН/ЖА/дпа/ртр/дв
Редактор: Ж. Ацеска