Yawan Mutanen Birnin New York
April 18, 2006Jama’a masu sauraronmu assalamu alaikum, barkammu da wannan lokaci, barkammu kuma da sake saduwa da ku a cikin wani sabon shirin na amsoshin takardunku,shirin da yake amsa tambayoyin da ku masu sauraro kukan aikomana.
Tambaya:Fatawarmu ta wannan makon, ta fitone daga hannun Malama Rabi Ibrahim daga Jiddah a Makkatul-mukarramah. Malamar ta ce, kasancewar Birnin New York shine Birni mafi yawan Al’umma a Kasar Amurka,to a Duniya kuma shine na nawa a yawan al’umma?
Amsa: To malama Rabi, idan aka hada da garuruwan dake karkashinsa,Birnin New York shine Birni na biyar (5) a jerin Birane mafiya yawan al’umma a Duniya, inda ya ke da yawan al’ummar da suka kai Mutane 16,626,000.
Amma idan ana batun Birnin da ya fi kowanne Birni yawan al’umma a Duniya, to Birnin Tokyo,da ke kasar Japan, shine Birnin da ya fi kowanne yawan al’umma a Duniya, inda ya ke da yawan al’umma da suka kai Mutane Miliyan 28,025,000.
Gadai jerin Birane goma (10) wadanda suka fi yawan al’umma a Duniya.
1. Tokyo, Japan - 28,025,000
2. Mexico City, Mexico - 18,131,000
3. Mumbai, India - 18,042,000
4. Sáo Paulo, Brazil - 17, 711,000
5. New York City, USA - 16,626,000
6. Shanghai, China - 14,173,000
7. Lagos, Nigeria - 13,488,000
8. Los Angeles, USA - 13,129,000
9. Calcutta, India - 12,900,000
10. Buenos Aires, Argentina - 12,431,000
Da fatan mai sauraron tamu ta gamsu da wannan amsa.