Yan tawaye sun kai hari kan soji a Kongo

A kasar Kongo magoya bayan wani janar na soja da yayi tawaye sun kai hari da manyan makamai kan sansanonin soji a gabashin kasar.

Ministan harkokin cikin gida na Kongo Denis Kalume yace dakarun shugaban tawayen janar Laurent Nkunda sun kaddamar da hari a sansanin Sake yau da safen nan,inda dakarun sojin kasar kuma suka maida martani.

Majiyoyi daga MDD sun tabbatar da kaiwa wannan hari a yankin na Sake wanda shinnge ne tsakanin dakarun gwamnati dana yan tawayen.