Rigingimu na haddasa kwararar 'yan gudun hijira a Najeriya
June 26, 2012
Akwai wasu al'ummomin da dama da suka nemi mafaka kodai a jihohi da garuruwa maƙobta inda wasu suka nemi matsugunai na ‘yan gudun hijira ko kuma makarantun firamare gwargwadon iko da halin da suke da shi.
Yanzu haka unguwanni da dama a Maiduguri sun zama kufayi saboda yadda mazauna unguwannin suka ƙaurace musu.
Tuni kuma wasu jihohin suka fara kwashe ɗaliban su dake a manya da ƙananan makarantun a wannan jihohin don gudun abinda ka iya samun su ganin hare-hare da kuma matakan magance su, na ƙara zafafa.
Wane hali waɗanan al'umma da suka tsere daga garuruwan suke ciki tambayar da na yiwa Hajiya Fatima kenan wadda ta ce ko shakka suna cikin mawuyacin hali na rashin sanin makomarsu.
Jami'a na tilasta wa mutane barin gidajensu
Ƙungiyoyin kare hakkin bani Adama dai na zargin jami'an tsaro da hukumomi tilastawa mutane barin matsugunansu saboda matakai da suke ɗauka, kamar yadda Abdullahi Muhamad Inuwa shugaban ƙungiyar tabbatar da adalci tsakanin al'umma a tarayyar Najeriya yayi nunar.
A Damaturu fadar gwamnatin jihar Yobe ma ɗaruruwan mazauna garin sun tsere saboda tashin bama-bamai da kuma matakai da ake ɗauka na daƙile hare-haren.
Sai dai kakakin gwamnan jihar Abdullahi Bego yace lokaci yayi da al'ummomin za su dawo gida saboda an samu zaman lafiya a garin sanadiyyar matakai da gwamnatin jihar ta ɗauka na tabbatar da tsaro.
An fara samar wa mutane abubuwan sauƙaƙa rayuwarsu
Haka kuma gwamnatin jihar ta samar da motocin safa da za su sauƙaƙe wahalhalun sufuri da al'umma suke sha sanadiyyar haramta amfani da babura a wannan gari da kuma samar da motocin safa ga makarantun sakandare gami da tallafi da ake baiwa ɗaiɗaiku da ƙungiyoyi.
Ita ma gwamnatin jihar Borno tace tana iya ƙoƙarinta na samar da yanayi da al'umma za su dawo gidajensu don ci gaba da harkokin su na yau da kullum.
Mawallafi: Aminu Suleiman Mohammed
Edita: Mohammad Nasiru Awal