Shugaban Burundi ya ce zai sauka a 2020

Shugaba Nkurunziza ya bayyana batun saukarsa daga mulki ne lokacin da ya ke jawabi ga magoya bayansa da jami'an diflomasiyya a birnin nan na Gitega da ke tsakiya kasar inda ya ce zai bankwana da mulki a shekarar 2020. A watan da ya gabata ne dai aka gudanar da wata kuri'a ta raba gardama kan gyara ga kundin tsarin mulkin kasar inda aka kara wa'adin da shugaban kasa zai yi zuwa shekaru bakwai, batun da ake ganin Shugaban ya yi ne don ya cigaba da kasancewa kan karagar mulkin kasar sai dai ya ce ba shi da wannan aniya.