1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Labarai

Matakin koran baƙin haure a Faransa

Faransa ta kama hanyar fatattakar baƙin haure da suka haɗa da 'yan Gypsy

default

Wasu mata da yara 'yan Gypsy

Shugaba Nikolas Sarkozy na Faransa, ya ba da umarnin koran 'yan ƙabilar Gypsy da suka shiga ƙasarsa ba akan ƙa'ida ba. Ya kuma yi kira da a wargaza sansanoninsu. Hakan ya samu ne sakamakon tattaunawar gaggawa da Sarkozy ya buƙaci a gudanar a matsayin ɓangare na yaƙin da ya ayyanar akan miyagun lefuka da kuma masu ta da zaune tsaye, a biranen ƙasar. Jami'an gwamnati sun yi wannan zaman ne, bayan da aka yi arangama tsakanin 'yan Gypsy da 'yan sanda a farkon wannan wata bayan da 'yan sandan suka bindige wani matashi da ke guje wa shiga hannunsa a garin Loire Valley.

Sarkozy ya ce za a hukunta duk wanda ke da hannu a cikin wannan ɗauki-ba-daɗin. Ministan cikin gidan Faransa, ya ce akwai sansanonin kimanin 300, da aka kakkafa ba a kan ƙa'ida ba, da ke zaman matsugunai ga 'yan Gypsy da kuma matafiya. Ya ce za a rufe waɗannan sansanoni nan da watanni uku, kuma 'yan Gypsy waɗanda ba 'yan asalin wannan ƙasa ba ne, da ke aikata miyagun lefuka za a koma da su ƙasashensu na asali.

Mawallafiya: Halima Balaraba Abbas

Edita: Umaru Aliyu