Martani kan rataye matasa 15 a Masar | Siyasa | DW | 27.12.2017
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Siyasa

Martani kan rataye matasa 15 a Masar

A karon farko a sabon tarihin siyasar Masar, an zartar da hukuncin rataya ga matasa 15 lokaci guda, bayan da wata kotun sojoji ta samesu da laifin kai hare hare kan sojoji da jami'an tsaro.

Zartar da wannan hukuncin da ke zuwa a daidai lokacin da 'yan ta'adda a yankin Sinai ke kara kaimin hare-harensu kan jami'an tsaro da ma fararen hula, tauna tsakuwa ne don aya ta ji tsoro, inji daya daga cikin lauyoyin gwamnati:

"Wannan hukunci ne da ke kan doka. Sun amsa wannan laifin da bakinsu, baya ga tarin shaidun da aka tara. Kowa ya kashe a kasheshi, haka ne zai sa kasa ta zauna lafiya.”

Karancin shekarun wadanda aka yankewa hukuncin dai ya sanya hatta masu goyan bayansa sun so da ai musu sassauci. Dangin wadanda aka ratayen da suka je karbar gawarwakinsu, sun yi ta jan Allah ya isa.

Ägypten - Todesurteil für elf Angeklagte (STR/AFP/Getty Images)

Wadanda aka tsare dai kan ga tashin hankali a Masar kamar wadannan a 2015

Tuni dai kungiyar 'Yan uwa Musulmi ta soki hukuncin da ta ce na tsagwaron siyasa ce, ta na mai kira ga 'yan kasar su yunkura don kifar da Sisi tun irin wannan danyen hukuncin bai iso kan su ba. 

Kungiyar kare hakkin bil'Adama da ta yi tir da kisan, ta nemi da a soke kotunan sojojin, kana a rika tuhuma a sarari, don tabbatar da adalci.

Ita kuwa kungiyar lauyoyi mamakinta ta nuna da saurin gama shari'ar gami da zartar da hukunci. Su ma dai galibin 'yan kasar, da ke ci gaba da nuna kaduwarsu da hukuncin, sun nuna cewa an yi cuta, ganin cewa matasan kadan suka dora a shekaru ashirin na haihuwa.

Sauti da bidiyo akan labarin